மட்டக்களப்பில் இளம் குடும்பஸ்தர் தற்கொலை

மட்டக்களப்பு-களுவாஞ்சிகுடி பொலிஸ் பிரிவிற்குட்பட்ட பழூகாமம் பிரதேசத்தில் குடும்பஸ்தர் தூக்கிட்டு தற்கொலை செய்து கொண்ட சம்பவம் இன்று செவ்வாய்க்கிழமை இடம்பெற்றுள்ளதாக பொலிஸார் தெரிவித்துள்ளனர்.

பழூகாமம் மாவக்குளம் பிரதேசத்தைச் சேர்ந்த இரண்டு பிள்ளைகளின் தந்தையான சிவனேசராசா-கிருபைக்குமார் வயது (44) என்பவரே இவ்வாறு சடலமாக மீட்கப்பட்டவராவார்.

தனது தொழிலின் பொருட்டு சம்பவ தினத்திற்கு முதல் நாள் கொழும்பு சென்று வீடு திரும்பியவர் தனது வயலினை பார்ப்பதற்கு சென்றவர் அன்று இரவு வீடு திரும்பாத நிலையில் மறுநாள் பழூகாமம் மாயான வீதியில் உள்ள மரமொன்றில் தூக்கிட்டு தற்கொலை செய்த நிலையில் காணப்பட்டதனை கண்ட நபர் சம்பவத்தை வீட்டாருக்கு தெரிவித்ததாக பொலிஸாரின் ஆரம்பக்கட்ட விசாரணைகளின் போது தெரிய வந்துள்ளது.

களுவாஞ்சிகுடி நீதிமன்ற நீதிவான் ஜே.வி.ஏ.ரஞ்சித்குமார் சம்பவ இடத்திற்கு சென்று சடலத்தை பார்வையிட்ட பின்னர் பிரேதத்ததை பிரேத பரிசோதனைக்கு உட்படுத்தும்படி பொலிஸாருக்கு உத்தரவிட்டதோடு பிரேத பரிசோதனையின் பின்னர் நெருங்கிய உறவினர்களிடம் பிரேதத்ததை ஒப்படைக்கும் படி உத்தரவிட்டார்.