சாரதி உரிமம் வழங்குதலுக்கான கட்டணம் அதிகரிப்பு

புதிய சாரதி அனுமதிப் பத்திரம் பெறுவதற்கான கட்டணங்கள், சாரதி உரிமம் இருந்தால் புதுப்பித்தல் அல்லது செல்லுபடியாகும் காலத்தை நீட்டித்தல் மற்றும் ஏற்கனவே உள்ள சாரதி உரிமத்தை புதிய சாரதி உரிமமாக மாற்றுவதற்கான கட்டணங்கள் ஆகியவை அதிகரிக்கப்பட்டுள்ளன.

போக்குவரத்து மற்றும் பெருந்தெருக்கள் அமைச்சர் பந்துல குணவர்தன அரசிதழ் மூலம் சாதாரண மற்றும் ஒரே நாள் சேவையின் கீழ் வழங்கப்படும் சாரதி அனுமதிப்பத்திரக் கட்டணங்களை திருத்தியமைத்துள்ளார்.

போக்குவரத்து மற்றும் நெடுஞ்சாலைத்துறை அமைச்சர், மோட்டார் போக்குவரத்துச் சட்டத்தின் (அத்தியாயம் 203.) பிரிவு 44, 123, 124, 125, 126, 126B, 128, 132, 132 A மற்றும் 231 உடன் படிக்கப்பட்ட பிரிவு 237 இன் கீழ் விதிமுறைகளை திருத்தியுள்ளார்.

இதன்படி, 2009ஆம் ஆண்டு மார்ச் மாதம் 26 ஆம் திகதி அதிசிறப்பு அரசிதழில் வெளியிடப்பட்ட 2009ஆம் ஆண்டின் முதலாம் இலக்க சாரதி அனுமதிப்பத்திர (தீர்ப்பு) ஒழுங்குமுறைகள் இரத்துச் செய்யப்பட்டுள்ளன.

புதிய அரசிதழின் அடிப்படையில், முதலாம் வகுப்பிற்கான அனுமதி மற்றும் புதிய சாரதி உரிமத்திற்கான விண்ணப்பம் சாதாரண சேவையின் கீழ் 2 ஆயிரத்து 500 ரூபாயாகவும் ஒருநாள் சேவையின் கீழ் 3 ஆயிரத்து 500 ரூபாயாகவும் நிர்ணயிக்கப்பட்டுள்ளது.

ஒரே நேரத்தில் இரண்டு வகுப்புகளுக்கு சாதாரண சேவையின் கீழ் 3 ஆயிரம் ரூபாயும் மற்றும் ஒரே நாள் சேவைக்கு 4 ஆயிரம் ரூபாயும் நிர்ணயிக்கப்பட்டுள்ளது.

மேலும், மூன்று அல்லது அதற்கு மேற்பட்ட வாகன வகுப்புகளுக்கு, சாதாரண சேவைகளின் கீழ் கட்டணம் 3 ஆயிரத்து 500 ரூபாயும் அதே ஒருநாள் சேவையின் கீழ் 4 ஆயிரத்து 500 ரூபாயும் நிர்ணயிக்கப்பட்டுள்ளது.

இதேவேளை, மோட்டார் போக்குவரத்து திணைக்களம் ஒரு வாகனத்திற்கு சாரதி உரிமம் செயல்முறைத் தேர்வுக்கு மீண்டும் விண்ணப்பிக்க ஆயிரம் ரூபாய் கட்டணம் நிர்ணயிக்கப்பட்டுள்ளது.